अमेरिकेला जरा दाखवून द्यावे
आपल्या रुपयाची घसरण सध्या चालू आहे त्यावर अर्थक्षेत्रात चिंता व्यक्त होते. ग्रीस, स्पेन, इटली वगैरे देशातील गुंता मला नीटसा कळलेला नाही परंतु काही महिन्यांपूर्वी हिलरी क्लिंटन भारतात येऊन गेल्या, त्यांची चाल लक्षात येते. इराणकडून भारताला होणारा तेलपुरवठा बंद व्हावा हा त्यांचा उद्देश स्पष्ट झाला, त्यांस अपयश आले. त्या परत गेल्यावर डॉलरच्या तुलनेत रुपाया घसरू लागला. ही घसरण नैसर्गिक नसून `मेड इन यूएसए' आहे असे वाटते. फार काळ ते नाटक चालणार नाही. अमेरिकेला धुडकावून त्याची जागा दाखवून देण्याची ही संधी चालून आली आहे. कारण इराण हा जगात एकमेव देश आहे, तो भारताशी देवाणघेवाण रुपयात करतो. इराणकडून तेल व गॅस आयात कमी करण्याऐवजी दुप्पट करणे आपल्या हिताचे आहे. कारण तेलाच्या किंमतीपोटी त्यांना मिळणाऱ्या भारतीय रुपायातील ८०% भाग इराण भारतीय उत्पादनांच्या खरेदीसाठी वापरतो. आपल्या सर्व व्यवहारांत रुपायावरच भर द्यायला हवा.
१. सध्या आयपीएल क्रिकेट सोन्याचे अंडे देणारी कोंबडी आहे. या उल्लूपणाची चलती चालेल तेवढी चालवावी, पण विदेशी खेळाडूंना त्यांचे मानधन (टेबलावरून वा खालून) रुपयातच देण्याचे बंधन सरकारने घालावे.
२. नजरेला खुपावे इतक्या प्रमाणात आपले लोक परदेश वाऱ्या करू लागले आहेत. रुपयाच्या घसरणीला तेही एक कारण आहे. `व्हिसा मिळाला' याचा आनंद-नाच चालतो. परदेशी व्हिसा देण्याबाबतीत आपल्याच सरकारने कडक बंधने घालावीत. राजकारण्यांपासून त्याची सुरुवात करावी. गरजेपेक्षा पैसा जास्त झालेल्या `सुविद्य' समाजात परदेशी जाणे ही फॅशन व प्रतिष्ठा वाटते, पण आपले चलन तिकडे बदलून खर्च करणे हे रुपयाची घसरण करण्याला साहाय्य करते. ते टाळणे देशाच्या मोठ्या हिताचे आहे.
- कर्नल जयंत चितळे ,
(मोबा.९३७१८०७४९१)
८७०/२, भांडारकर रस्ता, पुणे ४
Comments
Post a Comment