आठवांचे साठव.....
- वसंत आपटे
अॅड.श्री.बाळासाहेब आपटे यांचे नाव फार आधीपासून प्रसिद्ध होते, पण त्याआधी प्रत्यक्ष ओळख झाली ती त्यांचे `ज्येष्ठ' ठाण्याचे डॉ.शां.प.आपटे या तत्त्वज्ञाची! माहीमला श्री.बाळासाहेब यांच्याकहे एकदा जायला हवे असे वाटत राहिले पण एकतर त्यांचा प्रामुख्याने दिल्ली आणि शिवाय इतरत्र प्रवास; आणि माझ्या दृष्टीने दिल्लीच काय, मुंबईसुद्धा दूरच! पण जमवायचं म्हटलं की जमतं!
दिल्लीत श्री.प्रमोद मुजुमदार यांची भेट घेण्यासाठी बिश्वंभरदास मार्ग (मराठीत बी.डी.रोड) शोधून स्वर्णजयन्ती अपार्टमेंटात शिरलो. रहिवाशांची नावे आणि फ्लॅट नंबरची यादी पाहताना एकदम `अॅड.बाल आपटे, सांसद' दिसले. ते तर मुजुमदारांयाच्या वरती २ मजल्यांवर होते. अर्थातच प्रमोदजींकडचे आवरून मी दोन जिने चढलो, आणि दार ठोठावले.
कुणीतरी कर्मचाऱ्याने दार उघडून मला आत घेतले. मी माझे नाव नीट सांगण्याऐवजी बॅगेत बाळगून ठेवलेला भडंगाचा एक पुडा आत पाठवला आणि अंमळ थांबलो. पाच मिनिटात तेच भडंग हातात धरून खासदार पुढे येत म्हणाले, ``कोण सांगलीहून आलंय?''- माझ्या नावपत्त्यापेक्षा त्या भडंगामुळं त्यांना सांगलीची नेमकी ओळख आधीचीच पटली होती. त्यानंतर मी त्यांच्यात विरघळून `आप्त आपटे' होण्यास वेळ लागला नाही.
दोन वर्षांपूर्वी सांगलीत आपटे परिवाराचे संमेलन घेण्याचे ठरले, आणि श्री.बाळासाहेब आपटे यांनी निर्मलाताइंर्सह येत असल्याचे कळविले. स्वाभाविकच संयोजकांना उत्साह आला. पहाटे त्यांना उतरून घेण्यास रेल्वे स्टेशनवर गेलो तेव्हा रीतीप्रमाणे त्यांच्या पक्षाचे मोजकेच प्रतिनिधीही हजर होते. संमेलनात ते उभयता आनंदाने सहभागी झालेच, परंतु जातेवेळी हळूच माझ्या हाती पति-पत्नी दोघांचे प्रतिनिधी शुल्क देऊन गेले. ``माझ्याकडून नाव नोंदणीचे पैसे घ्यायला नकोत, असा इथला सूर दिसला. पण मी इथं आपटे आप्त म्हणून आलोय, पाहुणा नव्हे!'' असे बजावून त्यांनी पैसे दिले. ही नम्रता व शुद्धता अनुकरणीय!
सरसंघचालकांनीच त्यांच्याबद्दल म्हटलं की, आपल्या आचरणातून सर्वसामान्य कार्यकर्त्यांना आपलंसं करून विश्वास देणारे त्यांच्यासारखे व्यक्तिमत्त्व दुर्मिळ!
Comments
Post a Comment